Seleccionar una pagina

Critica literària

0 |

Histoire de l’Occitanie – Occitanie, le pays d’une langue

Histoire de l’Occitanie
(Occitanie, le pays d’une langue)
Felip Martel
Edicion Yoran Embanner, 2019
11 x 17 cm – 448 paginas
12 €

Escriure l’Istòria d’Occitània, assajar de tirar un fiu d’Ariana dins lo dedale deis eveniments, dei guèrras, deis afondraments e dei renaissenças, dei revolucions e deis empèris, temptar de trobar una dralha per comprene e traversar lei sègles. D’unei lo faguèron, segur, coma Robèrt Lafònt e son Histoire de l’Occitanie en 1979, mai recentament Jean Sagnes e sa Petite histoire de l’Occitanie, en 2003. La creacion de la region administrativa, en 2016, ven complicar l’afaire, èra donc necite de propausar un novèl obratge. Lei dos sota-títols (un diferent sus la primiera e la darriera de cobèrta) : « le point de vue occitan » e « le pays d’une langue » pausan ben lo quadre. Es donc un estudi vist dempuèi l’espaci occitan e dempuèi lo territòri de la lenga que nos desliura Felip Martel, un agach decentralizat e una vision larga ligats, avant tota causa, non pas a de frontièras fisicas, mai puslèu a l’immensitat d’un imaginari linguistic. « Mèfi ! Una Occitània pòu n’escondre una autra » nos ditz lo tèxte de presentacion, coma per nos convidar a un viatge a travèrs lei rebats, en-delai de la susfàcia, au còr de la complexitat d’Òc. Per nos guidar dins lo laberint istoric, Felip Martel, que fuguèt cercaire au CNRS e professor a l’Universitat de Montpelhièr, capita de debanar un fiu cronologic en quatre partidas. Un primier moment concentrat sus leis originas, la pluralitat d’un territòri dobèrt e organizat entre Ocean e Mediterranea, auturas e baissas, nos esclaira sus lo ròtle determinant de la romanitat e deis infuéncias divèrsas que fargan lei basas de la lenga d’òc. I aprenèm, entre autre, que la paraula « pantais » ven dau grec (coma « fantasma »), çò qu’es pas sens influéncia sus nòstre biais de somiar l’Istòria occitana ! Lo temps fòrt trébol deis invasions barbaras puèi de l’Empèri carolingian es trachat ambe clartat e precision, çò qu’ajuda a encadenar puèi sus l’edat mejana. Aquela segonda partida fa tombar leis idèas recebudas costumièras sus la civilizacion ideala dau Paratge tot en afortissent leis avançadas e leis especificitats d’aqueu periòde fondator de la cultura occitana. La tresena e la quatrena partidas nos fan avançar, au ritme dei cambiaments de societat e dei borrotlaments religiós, politics e filosofics, migratòris, fins a aquela realitat d’ara : l’Occitània viventa e inagantabla que contunha de geinar lei nacionalismes e lei reduccions provincialistas de totei menas. Una tièra de mapas illustradas e de documents vènon completat l’obratge, en annèxe, e nos permeton de mielhs sasir lei nocions abordadas dins lo libre. Regretam pasmens l’image de la primièra de cobèrta, un pauc reductritz, amb un rèire-gost de ja vist e reçauput : lo castèu de Montsegur en rèire fons. L’editor breton Yoran Embanner es costumier d’aqueleis illustracions un pauc simplas que, es un vejaire personau, son luenh de rendre compte de la prigondor e de la riquesa dau trabalh de Martel. Mai, coma sovent, fau saupre anar en delai deis imatges…

A prepaus de l'autor

Silvan Chabaud

Silvan es redactor al Diari, òc, mas carga mai de casquetas qu'aquela : jol nom de "Chab" canta dins Mauresca (Fracàs Dub) dempuèi la creacion del grop en 1999, e tanben dins Doctors de Trobar, doas formacions que fan sentir qu'es lo Massilia Sound System que lo faguèt cabussar dins l'emplec vivent de la lenga occitana. La lenga la maneja d'alhors tant que publiquèt un recuèlh de poesia, "Leis illas infinidas / Les îles infinies" (Jorn, 2012). Enfin, Silvan es universitari, autor d'una tèsi sus Bellaud de la Bellaudière, poèta provençal del sègle XVI e actualament cargat de corses a la facultat Pau Valèri de Montpelhier.

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !