Lo trabalh de doblatge en lenga nòstra entreprés per l’associacion Conta’m s’interèssa aqueste còp a Heidi, lo roman escrit per la femna de letras soïssa alemanica Johanna Spyri, publicat en 1880.

Son eroïna, una jove orfanèla, es devenguda un personatge mitic de Soïssa e lo roman fa partida dels racontes los mai celèbres de la literatura d’enfança e de joinessa.

Heidi se’n va viure a l’ostal de son paire-grand, en dessús de Maienfeld, dins lo canton dels Grisons dins los Aups soïsses. D’en primièr es espaurugada pel vièlh solitari que viu coma un ermita dins son maset, mas lèu se met a l’aimar. Amb son novèl amic Peter, lo pichon cabrièr esmalit amb l’escòla, descobrís la beutat dels alpatges. Mas la tanta d’Heidi, qu’estima qu’aquela educacion es pas coma se deu, lòga la drolleta dins una rica familha de la vila, a Francfort-sur-le-Main en Alemanha, ont deu tenir companhiá e ajudar Clara, una drolleta paralisada. Mas Heidi se sentís plan nostalgica dins sa novèla vida, luènh de la montanha e sòmia pas qu’a una sola causa, se’n tòrna en çò del grand …

Lo contèxte istoric, que pausa los borroladisses socials de l’èra industriala, participèt del succès d’aqueles romans bastits sus la confrontacion entre un univèrs alpèstre natural e san, e una vida ciutadina en plena mutacion industriala a la quala es associadas la malautiá e l’indiferéncia.

Daissatz-vos pertocar per aquel viatge dins lo passat e descobrissètz la vida dins los Aups soïsses del sègle XIX.