Fraires de sang e d’arma

Lo film Montre jamais ça à personne es una seria documentària realizada per Clamenç Cotentin en doas sasons.

Clamenç Cotentin es lo fraire dau cantaire Orelsan. Seguís son fraire dempuei vint ans sensa relambi, camera a l’espatla. Aqueu projècte a la promièra persona nos permet de participar a l’ascension dau provinciau. Es un film frairenau de collègas sus la fidelitat mostrada coma una fòrça. Nos agrada de veire la chorma evoluir ambe lo cantaire qu’a lo sens d’equipa : Skread ò Gringe.

La sason un fonciona a l’entorn d’un nos dramatic : una cançon, Sala Puta, mal interpretada per lei mèdias e lei politics signarà lo fracàs dau jove que remontarà mai fòrt, mai carismatic e mai… esportiu. Orelsan se laissa pas avuglar per lei farfantelas dau succès. Vesèm coma a la cima de son succès dona sa chança a son amic Gringe en tornant formar un grope de rap : Casseurs Flowters.

La sason dos es encara mai capitada. Lo sang : lo fraire cineaste sacrifica son mestier de jornalista esportiu sus Canau Plus per s’aconsacrar totalament a son grand fraire. Aqueu segond projècte s’adreiça ais artistas coma ai curiós : vesèm l’elaboracion d’un disc de rap de sa genèsi (l’escritura solitària en plen COVID) fins a son elaboracion collectiva.

Lo documentari es ben trabalhat sota seis aspèctes que podrián semblar amators (coma leis òbras dau cantaire, m’anatz dire, “bricolejadas” ambe mestria).

Es clafit de vida. Es optimista (lo clip de la tota fin es fabulós per aquò). Es una faula sus lo collectiu, la frairetat e l’amistat etèrna. Es fòrt coma l’aventura que representa.