Seleccionar una pagina

Fotomatòn

0 |

Fotomatòn – Tomàs Baudoin

Quau percors t’a miat au mestièr de musicaire ?

La musica, que’n hèi dempuish l’atge de 12 ans. Que soi grafista de formacion professionau. Mes la mea purmèra formacion vertadèra qu’estó de musiquejar dab flabuta e tamborin de còrdas, en eveniments de la vita populara en Biarn. Qu’èi aprés dab los Menestrèrs Gascons puish dab lo men oncle Joan Baudoin. Que toquèi en Pastoralas, animacions de mercats… Tot çò qui’s pòt har dab ua flabuta e un tamborin quan ès mainatge. La canta qu’ei vienuda mei tard, de cap a 18 ans. Uei que soi membre deu grop Artús, deu duò D’en Haut format dab Roman “Pairbon” Colautti membre d’Artús tanben, d’Aronde, d’espectacles de conte, e que transmeti la canta tradicionau gascona.

Coma musician de l’oralitat, qué son los tons encastres d’escritura, d’expression e de creacion ?

Vertat que foncioni dab l’oralitat permèr, l’escritura de la musica suu papèr n’ei pas le men utís. En los mens projèctes, qu’adobam ua mestior musicau tradicionau ja existenta. Tot que’s hè a l’aurelha. En darrèras, que i a avut Ors lo disc d’Artús, entau quau avem escriut tèxtes e compausat musicas amassa, dab los membres deu grop. Qu’èi creat e compausat tanben tà las poesias de Bernard Manciet, de Rodin. Que jogui hèra de musica improvisada tà companhar los contes de Sèrgi Mauhourat, David Bordes, Daniel Cabarry.

Quin basteishes aqueths univèrs musicaus sonòrs, tà companhar un raconte ?

En mei de la flabuta e deu tamborin, de la boha e de la votz, los instruments qui m’agradan de har soar ne son pas forçadament instruments vertadèrs. Ua placa de metau, un canèth… Que son sustot elements de percussions, qui hèn un son particular.

Aquò qu’ac as aportat tanben en Artús, D’en Haut, Aronde

Quiòc. Aronde, l’encontre enter D’en Haut e Les Poufs à cordes, qu’ei un grop qui a hèit un tribalh deus bons suus instruments a còrdas, dab los vriulons, vriuloncèla e contrabaisha. Jo que participi dab la mea votz e las percussions qui son tanben en D’en Haut. Qu’èm los quate a crear amassa. Que m’avisi qu’ei quasi tostemps atau, en los projèctes aus quaus e preni part. La creacion b’ei collectiu.

Tomàs Baudoin

Musicaire de tradicion orau

Çò que t’apòrta a tu, aquera aventura d’Artús e lo son foncionament collectiu ?

Que’m neureish lo vente e l’esperit ! Tau com los autes musicaires d’Artús, qu’ei lo men projècte artistic professionau màger. Qu’èi l’enveja de portà’u lo mei luenh possible. E qu’ei atau de la debuta enlà, dempuish la creacion d’Artús en 2000. Tribalhar amassa dempuish tant de temps n’ei pas a la portada de tots. Peu moment, ne sèi pas çò que herí shens aquò. Drin de dessenh, dilhèu… (arrísers)

Que pareish as un navèth projècte qui ei a vàder ?

Quiòc, un duò de cant dab Lutxi Achiary, qui s’apèra Aèdes. Un projècte intimista acompanhat d’un instrumentarium leugèr. Qu’i cantam a ua o duas votz, cantas deu repertòri orau gascon. Quauques tròç que son ja en escota sus internet.

A prepaus de l'autor

Caroline Dufau

Bearnesa expatriada a Tolosa, Carolina Dufau, dicha Carò, es una artista de terren, mai tots-terrens, de la cantèra, art que mestrèja "de com cau", fins a la vidèo al dintre del Collectiu Dètz. Carò canta dins lo grop 100% femenin Cocanha e dins d'autras formacions, e es tanben redactritz al Diari.

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !