Seleccionar una pagina

Dorsièr

0 |

Dorsièr – Polar : Joan Ganhaire – Un tant doç fogier

Per la seisena fes, Joan Ganhaire nos fa seguir lo comissari Darnaudguilhem e l’inspector Diagana Traoré dins una enquista plena de rebombiments, mestrejada de man de mèstre. La vila imaginària de Maraval i pren una dimension de mai en mai espessa, l’univèrs de l’autor es ara installat : avèm l’impression de lo conéisser, d’i èstre anat, entre « cors Lesfargas » e « baloard Dau Melhau »… La musica lemosina, Ganhaire la met au servici d’un racònte que balança entre negror e comic de situacion, ambé un ton original que dona tota sa sabor au tèxte.

Aqueste còp, Ganhaire nos dobrís lei pòrtas d’un fogau d’acuelh per andicapats (« los endechats » en lemosin) sonat « l’Espelida ». Siam dins un microcòsme, una pichòta societat. Lo murtre d’una joina residenta de l’establiment trebola aqueu monde claus onte lei non-dichs e lei secrets lei mai òrres van pauc a cha pauc se desvelar.

Lo roman es fidèu ai canons dau genre, l’equilibri es totjorn mantengut entre descripcion e analisi de la violéncia ordinària, critica sociala e retrachs de femnas e d’òmes dins sei vidas singularas. Lei personatges son estacants, lo comissari Darnaudguilhem tant coma lei segonds ròtles o lei victimas collateralas d’un afaire tentacular que nos tèn de pagina en pagina, sensa jamai pèrdre de buf ni de suspens. Darrier la trama principala, se destacan d’istòrias parallèlas : lo quotidian dei gents que trabalhan au « doç fogier » de l’Espelida, la vida vidanta dei policiers coma lo Diagana Traoré que viu entre doas culturas e comunica ambé leis esperits de la brossa maliana. Lo roman s’organisa coma lo plan de la vila imaginària de Maraval, de carrièra en carrièra, tot en espandiment, e lo legèire s’i passeja guidat per una intriga pivelanta.

Se, d’en primier, la varianta lemosina ben marcada de la lenga de Ganhaire pòu èstre una dificultat, amb un pauc de volontat e lo temps que fau per dintrar dins l’istòria, òm es sosprés puèi de l’oblidar e de s’i acostumar, naturalament : es aquí un dei torns de fòrça d’aquela escritura, rica e intelligenta. D’afondraments de pròvas en revelacions, ren es pas jamai segur, e fin finala, lei « fadats » que pòblan lo fogau de l’Espelida pareisson ben mai umans e normaus que la màger part dei gents que leis enròdan, emplegats, administratius, educators, parents o servicis sociaus.

Onte comença la foliá vertadièra ? Entre embarrament fisic, medicau e mentau, frustracions sexualas e violéncia retenguda, Darnaudguilhem assaja de tenir la barra, capitani d’un vaissèu esmarrat… Lei jornalistas que viran a l’entorn, l’enquèsta qu’avança gaire, la decepcion amorosa : tot pesa sus l’esquina d’un comissari anti-eròi qu’es pasmens un far dins la tempèsta. Dau rèsta, es ben au còr de la tempèsta o lei pès dins leis aigas fangosas qu’òm entrevei, subran, la lutz. Au bot d’aqueu seisen roman, es l’enveja de legir (o de tornar legir) lei volumes precedents que vos prendrà, e lo monde de Ganhaire, lo faretz vòstre : es çò que se debana, generalament, ambé lei bòns libres.

IEO edicions A tots
Novelum, 2017
18 x 13,5 cm – 144 p.
15.00€

A prepaus de l'autor

Silvan Chabaud

Silvan es redactor al Diari, òc, mas carga mai de casquetas qu'aquela : jol nom de "Chab" canta dins Mauresca (Fracàs Dub) dempuèi la creacion del grop en 1999, e tanben dins Doctors de Trobar, doas formacions que fan sentir qu'es lo Massilia Sound System que lo faguèt cabussar dins l'emplec vivent de la lenga occitana. La lenga la maneja d'alhors tant que publiquèt un recuèlh de poesia, "Leis illas infinidas / Les îles infinies" (Jorn, 2012). Enfin, Silvan es universitari, autor d'una tèsi sus Bellaud de la Bellaudière, poèta provençal del sègle XVI e actualament cargat de corses a la facultat Pau Valèri de Montpelhier.

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !