Seleccionar una pagina

Dorsièr

0 |

Dorsièr – L’occitan dins de l’estrangièr / Critica literaria

La literatura d’òc a sempre agut lo gost dau viatge, ben avant l’efièch de mòda : lo mitic Portulan de Roland Pecout o encara lo bèu libre collectiu Trobar doç around the world de Andrieu Abbe, Joan-Pèire Belmon e Tèiriç Òfre ne son la pròva. Aquelei Cronicas de Viatge de Sèrgi Labatut contunhan, a son biais, lo camin… Siam dins una mema vibracion primièra : aquela d’una pròsa clara e calorosa que s’arrèsta mai sus leis òmes que sus lo decòr dei païsatges. Luènh dau caminament iniciatic de Pecout, Sèrgi Labatut es dins un vai e vèni professionau que lo fa varalhar a l’azard dei contractes ai quatre cantons dau monde. Vaquí donc lei cronicas d’un emplegat de multinacionala, a l’encòp exoticas e rebats d’una rotina professionala : çò que, a primièra vista, nos càmbia dei bestsellers costumièrs dau genre.

Lo libre se dobrís sus Euròpa. Lei tèxtes son cortets, una pagina o doas, pas mai. Avèm l’impression de passar d’una fòto a l’autra, dins un album, de partejar de momenets simples, çò qu’es un biais de viure au mai pròche l’experiéncia de l’autor emai fuguèsse dei mai anecdotics. Leis evocacions d’Africa nos pòrtan mai luènh e pintran, coma un tablèu trocejat, lo puzzle d’un continent pivelant, multiple e pasmens enfrentat, de lònga, a sei problematicas economicas e socialas. La frasa, sovent corta tanben, esposa lo ritme de l’endrech, se carga dei perfums e dei sonoritats localas, embarca quauquei mòts en italian, en arab, en anglés, en lingalà e desplega un lengadocian blos e carnal. Maugrat la quantitat e la diversitat de luècs traversats, una unitat se tèis, pauc a cha pauc. L’autor, va comprenèm au fiu de la legida, trabalha dins una entrepresa de cervesa : es adonc au contacte, au còr de la vida-vidanta dei bars e deis espeçariás. La « bièrra » se beu dins lo mond entièr, e quin que siágue lo sieu nom, Primus, Béninoise… acompanha lo quotidian deis òmes sus una planeta aclapada de problèmas. Ansin, de nòva en nòva, passam d’un comptador a l’autre, d’una amistat a l’autra e siam pres au ritme dei rescòntres. Au Burundi o en Sardenha, a Sidi Bouzid o Cotonou, la paraula es onèsta, pas de postura o de sembla-poesia : lo testimoniatge sol e franc d’un occidental que se saup « estrangièr » mai que capita d’anar en delai deis aparéncias e pòt tocar una vibracion fonza, una lutz particulara. Es l’agach dau fotograf qu’es a l’òbra, o de l’amator d’art que cèrca dins totei sei viradas leis artistas dau canton. E oblidarem pas la literatura, sempre presenta, en rèirefons : Marcèla Delpastre legida dins un restaurant de Bujumbura, lo mite de Rimbaud au destorn d’una carrièra etiopiana e L’Arbatach de Joan Bodon a quauquei quilomètres de Bomerdès.

Sèrgi Labatut nos parla, vèrs la fin, de sa tissa de fotografiar de « tòlas ondadas » : « lo simbòl vertadièr de l’Africa. N’i a pertot. Lo material de basa ». Tòlas fotografiadas o pichons tèxtes raubats au temps que fila : es lo meme trabalh, l’atencion au detalh, l’escota de l’autre, la simplicitat, que permeton de tocar l’universalitat.

Sèrgi Labatut
Cronicas de viatge
IEO edicions, A tots n°209
13.5 x 18 / 104 pages
15.00€

A prepaus de l'autor

M’aboni !

Anóncia

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !