Seleccionar una pagina

Dorsièr

0 |

Dorsièr – ” L’espaci Nòrd-Occitan ” / Entrevista : Julian Pochelon

Julian Pochelon es lo creator de l’associacion « La Retornada » qu’òbra per la promocion de la lenga d’òc a Tença,
sus lo planetestèu dau Vivarés-Linhon, un luec de confinhas entre Velai, Nòrd Vivarés, auvernhat e vivaro-alpenc,
a quauquei quilomètres de la zòna dau francoprovençal.

Julian Pochelon, coma siatz tombat dins l’ola magica de l’occitan ?

Soi d’una familha païsana, d’un país a chaval entre Lèire Nauta e Ardecha, a la boina coma se ditz en vivaroalpenc. Ai creissut amb la preséncia de la lenga, subretot mos grands que parlavan entre-z-ei en linga d’òc. Ai agut lo parlar dins l’aurelha. Quò m’agradèt e m’i interessèri mai, plus tard, quand descobriguèri Massilia e comprenguèri qu’èra una cultura viva, joina.

Coma l’avètz apresa ?

Rescontrèri Sandre Arnaud qu’es ara professor al Puèi de Velai mas qu’a l’epòca èra regent d’una calandreta, aviam totes dos vint ans. Me diguèt que podiá m’ajudar e nos sèm botats a far d’occitan amb el, cada mècres. Nos sèm fach nòstre cors, amb mon fraire e d’amics. Quò durèt un temps puèi anèri seguir de corses amb Joan Roux al Puèi de Velai pendent cinc ans. Es coma aquò que me botèri a conéisser las veaas (las causas, coma disèm aquí) de l’occitan.

Puèi, avètz vougut vos implicar per la lenga, obrar ?

Òc. Èri ja organizator d’un festenal de reggae electro, aviáu una experiéncia de l’associatiu e me diguèri que quò seriá ben de crear un eveniment cultural occitan. Me mandèri a l’aiga solet e montèri lo festenal de « La Retornada », en 2013, a Retornac ont demoravi a aquel moment. Faguèri venir La Talvera e Lo Dalfin, una programacion nòrd occitana en fach, sèm plan dins la tematica !

Un primièr assai abans d’o faire a Tença.

Òc, es aquò, en 2014, lo festenal se faguèt a Tença : es una ciutat amb una identitat fòrta, sèm dins la montanha, i aviá una demanda aquí. Ara es un rendètz-vos annadièr e a permés d’estructurar l’associacion. Tença es ma vila, es aquí que voliáu passar a l’accion per l’occitan.

Una associacion que s’estructurèt e que comencèt d’alargar sei domenis d’accion justament ?

Quora se faguèt la primièra « Retornada » a Tença, botèri un papièr sul luòc de la fèsta, una aficheta ont i aviá marcat : « qual es que voldriá parlar la lenga d’òc a Tença ? » 45 personas se marquèron ! Comprenguèri que i aviá un interès mai fòrt que previst, me diguèri que chaliá far quicòm. Montèri alara los primièrs atalièrs de lenga, en vila. Ne soi un animator mai qu’un professor, soi aquel que manda las discutidas e empura las charradissas. I a dos gropes d’un vintenat de personas amb doas apròchas diferentas, dos biaisses de trasmetre la lenga. Diriáu que n’i a un qu’es mai demandaire d’una lenga especifica, del nòstre, un grop que retròba mai que mai lo plaser de parlar l’occitan dins sa varianta montanhòla e l’autre grop qu’es mai « alternatiu » e mai virat cap a la lenga d’òc estandard. Quò empacha pas de partejar de moments totes ensems, los uns e los autres… Soi ben content, es una aisina de trasmission qu’es en plaça e que fonciona franc, mescla de gents diferents : es intergeneracional e dobèrt, vaquí l’idèa !

Adonc un polit trabalh de trasmission e de socializacion de la lenga, tanben ?

Socializar la lenga es una tòca importanta a « La Retornada ». Volèm botar la lenga per charrièra, volèm que se vegèsse, que s’ausiguèsse ! Lo festenal es ja dins aquela amira mai ara, amb la creacion de « L’Ostal de la Linga[1] », en plen centre vila de Tença, es encara mai evident. Avèm un local, sèm visibles, nos fa un luòc de recampament e una veirina per nos far encara mai conéisser. Quò fa ara 1 an que sèm installats, sus la plaça, e vesèm ben la reaccion de las gents : se tornan botar a parlar la lenga. Avèm un amic que ten un bar e decidiguèt, per exemple, de servir en occitan cada març de matin !

[1]           La linga : varianta nòrd occitana de l’encontrada de Tença per « lenga »

Aquò torna, es la « Retornada », lo regrelh, lòngamai… un festenal, de cors, un ostal : podèm dire que n’avètz de trabalh ! Qual es que s’entreva de tot aquò ?

Ieu, mai que mai, que soi ara, en partida, salariat per l’associacion en mai de mon mestièr de paisan. Avèm tanben una persona qu’es en servici civic, Océane Charras, es aquí cada jorn, per trabalhar sus l’infografia, lo site internet, nòstra comunicacion e la comunicacion del festenal.  « L’Ostal de la Linga » es tanben una botiga ont se tròba de libres, de documents sus l’occitan, de disques etc… Se pòt consultar las causas sus plaça, manlevar, crompar, passar un moment amb nosautres, tot simplament, demandar d’entresenhas sus l’occitan.

En 2018, lei projèctes son nombroses ?

Segur. Venèm tot just de sortir un pichòt libreton sus la conjugason de la varianta occitana del Velai, es una primièra experiéncia d’edicion que volèm perseguir. Avèm lo projècte de fargar una colleccion amb de tematicas : gramatica, vocabulari, patrimòni… Volèm trabalhar sus l’òc de nòstre caire, sas especificitats e o far conéisser. Las idèas mancan pas, sèm en plena emulsion. Trabalham tre ara sus l’edicion que ven del festenal que se debanarà los 6,7 e 8 de julhet amb entre autres, lo grop Goulamas’k. L’occitan retròba sa plaça a Tença, dins la vida vidanta. Coma se ditz aquí « sèm franc contents » e tot aquò nos dona l’enveja e la fòrça d’anar encara mai luènh.

A prepaus de l'autor

Laissar un comentari

avatar

This site uses Akismet to reduce spam. Learn how your comment data is processed.

  Soscriure  
M'assabentar quand

M’aboni !

Anóncia

Compte-rendut: Lo Diari, vòstre vejaire nos interèssa !

Los darrièrs clips

Cargament...

La letra del Diari

Los darrièrs comentaris

    Soscrivètz a nòstra letra d'informacions !

    Soscrivètz a nòstra letra d'informacions !

    Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

    Avètz soscrich amb succès !