Claude Sicre – L’universitat Occitana d’Estiu de La Guépia 2018
Claude Sicre – L’universitat Occitana d’Estiu de La Guépia 2018
Deus Fabulous Trobadors au Forum de las lengas de Tolosa, Claude Sicre qu’ei un deus actors culturaus màgers laguens l’occitanisme. Uei que l’encontram entà parlar de l’Universitat Occitana d’Estiu de La Guépia
En tot observar la programacion de l’Universitat Occitana d’Estiu, qu’observam ua volentat hòrta d’anar de cap tà un public “normau”, pas sonque un public occitanista. Après quauques annadas, e’ns podetz díder se v’i escagetz e quin ètz entà hèr s’encontrar locutors naturaus e occitanistas ?
Foguèt ma primièra volontat quand, a la demanda del cònsol, ai acceptat de m’ocupar d’aquela universitat. D’en primièr per ausir l’occitan en defòra del quadre dels corses, de la part de monde que ne foguèt la primièra lenga, e que parlan entre eles de lors vidas. Davant los estagiaris e amb eles. Per la pedagogia de la lenga, perque dins aquelas conversacions, passan tota mena de causas indirèctament, que nos enriquisson sens qu’òm se’n avise. Per la prononciacion, tanben, e la pluralitat de las expressions popularas entendudas dins lo vam dels escambis. Per que los estagiaris entendan parlar de l’istòria d’aquelas personas. Enfin per que l’universitat se rapròche de la populacion.
D’una autra part, ensajam de multiplicar los rapòrts amb los abitants, en defòra de tota preocupacion occitanista dirècta, per far de ligams (intervencion al bal dels pompièrs, a la ceremonia del 14 de julhet, organizacion de rencontres en francés sus de subjèctes a prepaus de la vila e son canton … ) .
Talhèrs, cors, debats, activitat en lenga, qu’avetz encòra tot un programa entà dar un usatge a la lenga.
Lo Cinemà, lo teatre, la cançon, los estagis de cant, las lecturas, tot es fach per ausir d’occitan.
Podèm pas organizar ongan lo concors d’istòrias risolièras que fasèm dempuèi 4 ans : lo reprendrem l’an que ven e coma l’aviái promés en lo lançant, lo primièr prèmi va passar de 500 a 5000€, que seràn ofèrts per un mecèn
L’enveja de suscitar eth debat que caracteriza tanben la vòsta Universitat d’estiu. Debat sus la lenga mès pas sonque ?
Fasèm pas gaire de debats sus la lenga e sus l’occitanisme. Puslèu de conversacions (ongan, una sus l’aiga amb un fontanièr ; sus nòstras relacions amb los USA, amb la preséncia d’un vesin qu’es lo rèirefelen del President Theodore Roosevelt e lo pichon nebot de l’autre President Roosevelt : son aujòl a agut una correspondéncia amb Mistral e sòmia d’ajudar a montar una Mireia modèrna (avís als musicians occitans interessats !) .
A priori, l’Universitat de La Guépia que’s caracteriza per ua vision de la lenga, un estacament a la lenga parlada, autentica, pròcha deu locutors naturaus. Ei un engatjament hòrt?
Òc, plan fòrt.
Fòrça monde qu’an pas agut l’astre de grandir dins un parlar precís, que se son retrobats a legir e escotar de parlars nombroses e divèrses dins lor engatjament occitan – ieu lo primièr – an besonh, enveja, de se perfeccionar dins un parlar, dins una cultura locala.
Encòra un còp la programacion artistica que serà eclectica e de qualitat, e’ns podetz presentar drin eths grans moments d’aquera edicion.
Cors lo matin, mantun nivèl o especialitats : per exemple Murièl Vernhièras s’adreça sustot a de monde que vòlon utilizar l’occitan dins lor vida professionala o que n’an besonh dins lor vida associativa ; i aurà tanben un cors especializat suls parlars lengadocians e gascons que seguisson Garona, un per debutants etc…
Puèi un estagi de cant amb Laurent Cavaillé (Du Bartàs), un estagi de borrèia amb Sarah Capel acompanhada a l’acordeon per Hervé Capel ( Duo Artense), un estagi de violon per Basile Brémaud (Duo Artense) e un estagi de musica animat per Ivison Santos (Pernambouc) : estudi dels instruments tradicionals del forrô.
L’estagi « Attrapes » a destinacion dels 7/13 ans – succès l’an passat – es reconduch ongan e serà animat per Aurélie Neuville (Bombes 2 bal)
L’aprèp-miègjorn, conferéncias (bilanç operacion Al Canton ; rapòrt amb los USA…) o passejadas (toponimicas amb Bedel, ecologica amb lo fontanièr, istoricas, etc ) .
En fin d’aprèp-miègjorn, rencontres amb de locutors aborigènas e occitanofòns « naturals ».
A 19h los aperòs-balètis (Lo Jaç, Duo Artense, Ivison Santos etc)
Lo ser, cinemà de plen aire, concèrts lo dijòus amb Laurent Cavalier per son espectacle solo en partenariat amb lo Lez’art festival qu’enriquirà la programacion amb dos autres concèrts. Programacion tanben rica e festiva pel grand bal del divendres de ser amb Bassacada (bal trad’oc), Escambiar Roots Bal (de membres de las Bombes 2 Bal amb un extraordinari musician de Forrô del Parnambouc e una cantalona campiona del monde d’acordeon que mescla lo repertòri tradicional occitan amb lo «musette» d’en çò seu pontuat d’intermèdis de fest-noz breton. Sens comptar las suspresas !
Que v’i escagetz cada annada tà tornar dar un usatge a la lenga, drin de normalitat. A tèrme, e pensatz que sia possible de tornar dar un usatge regular drin sus tota l’annada?
Soi fòrça optimista a long tèrme sus la vida de l’occitan. E quitament a tèrme mejan : sufirà a un moment, de qualques reüssidas espectacularas (cinemà, musica, roman traduch) per atraire subtament de centenats de milièrs de joves e de mens joves. Per permetre aquelas òbras, cal un trabalh pacient e en prigondor ; lo que se fa a La Guépia e endacòm mai. Mas cal qu’aqueste trabalh pacient prepare dirèctament aquesta espelisson. Es aquí, me sembla, que La Guépia se distinguís dels autres eveniments occitanistas : cresèm fèrme a aquela estrategia.
Profièchi d’aquesta entrevista per far passar un messatge : se i a de monde motivats per donar un còp de man (acuèlh, organizacion sala : possibilitat lòtjament sus plaça), contactar Lenga Viva :
© Werner Braun Photographie
