… Bèths potons de Bigòrra enlà …
Aqueth abòr que mèrca sense contèsta lo bon anar e la productivitat de la musica occitana en tèrra bigordana …
Vam ! 3 sortidas de disc en Bigòrra en un mes, aquò qu’arregaudeish l’amna; prumèr dab lo còr de hemnas Daunas de Còr e lo disc Aròu. Aquera produccion qu’ei d’actualitat en pr’amor que hica en lutz un repertòri pirenenc estacat a Nadau e au sacrat. Qu’escotèi dongas dab drin de resèrva a la debuta aqueth disc…e que m’arretrobèi gahat per l’emocion dab las cantas Airetèras deu Lavedan, e Cantem en alegressa dab ua mencion tota especiau a la votz de Nadèta Carita, tot simplament unenca e estrambordanta. Plaça qu’ei balhada tanben a un repertòri desconegut dab las cantas Adishatz pastorelas de Comeli, o la nòvia n’a la corona l’i tomba, adobats de coma cau.
Amorós de polifonias, lo disc Aròu de Daunas de Còr que’s vòu indispensable ena vòsta discotèca !
Bigòrra canta qu’ei lo nenon deus grops Vox Bigerri e deus Cantaires Pirenencs de Tarba.
Aquera creacion qu’ei un enregistrament hèit ena glèida Senta-Terèsa, au parat deu hestau Tarba en Canta. Qu’arretrobam aquiu un repertòri mes classic interpretat per las duas entitats, dab l’energia e lo vam deus cantaires gahats de coma cau dab ua captacion de grana qualitat.
Pascal Caumont que qualifica lo disc de « chauvin », e vertat qu’aqueth disc e’s vòu ua fotografia d’un moment de canta a Tarba en 2016, sense nada pretencion e fin finau, lo plaser de la canta qu’ei centrau … e aquiu lo shuc d’aqueth disc de bon escotar.
Entà clavar que vam cridar a la Diversitat, dab un grop apitat en 2003 e de qui aimi hèra. Parpalhon que signa aquiu lo son 3au disc après 10 ans de silenci. Un silenci madurat, e romput dab tèxtes reïvindicatius e de tolerància dab las cantas Diversitat o lo rondèu de Manuel, on lo petit catalan de Matinhon e pren un cohat … musicau. Brau ! Dehenedors de la lenca bigordana dempuish 20 ans, Parpalhon que se’n torna dab umilitat e fraternitat, dab un disc pregondament fòlk-trad.
La prima qu’anonça enqüera produccions musicaus en Bigòrra dab los discs esperats deu collectiu Canta Se gausas e deu combò ròck Papà Gahús.
Sense pataqués e sense comunicar a tot pip pap, la Bigòrra qu’amuisha aquiu lo soa volentat d’ escríver la soa istuèra, en tot produsir e tribalhar… e sense hèr lo horvari.
Aquò que poderé servir de leiçon a quauques uns.
