Seleccionar una pagina

Critica literària

0 |

Bèth peu de sau – Joan Loís Lavit

Bèth peu de sau,
Joan Lois Lavit
Letras d’òc
152 p.
16.00 €

Libe joenessa, romans, romans istorics, estudis d’archius e polars ; Joan Loís Lavit qu’ei un vertadèr tocassèr dotat d’ua grana productivitat (un roman / libe audio e un polar en l’espaci d’un an).

La sortida de Bèth peu de sau que’m permet de portar tà la lutz la part de la sua òbra que m’estimi mes, eths sués polars.
E’vs hedó gòi Zocalfar e Lo Tin-Tin d’Ergé, alavetz qu’aimaratz Bèth peu de sau. Tot l’esperit deus dus permèrs tòmes de las hèitas deu comissari Magret que i ei present : omicidis de mòdes operatòris hastiaus (sustot « hemnicidis »), multitud de crimes sense ligam aparent, “luxuriancia verbau”, umor omnipresent, referencias etnologicas, ua goteta de sciéncia ficcion e un messatge d’amor entre eths pòbles en filigrane.

Maugrat drin de navèras tecnologias (blògs, utís de tribalhs navèths e tecnologia revolucionària), Magret n’ei pas James Bond. Eth Magret 2018 que s’està Magret e que se’n torna coma un « hlic » a l’anciana dab la sua equipa. Eth sué grope qu’a drin cambiat, daubuns que son partits, joens « guiques » que son arribats, Lo Cauerat (l’assistent eternau e pas tostemps eth mes finòt) e l’Anglesa (la de qui ei mes qu’ua collèga) que son notament demorats.
Coma de costuma, l’inspector qu’ei làs, que n’a hartera… aqueth còp que sembla au ras de la depression (nani, a de bonas que i ei).
L’accion que’s passa en Biarn. Eth Biarn que tremola. Eth Biarn qu’a paur.

E que s’i passa doncas en Biarn e mes que mes a Pau? Disparicions d’etnografes e de policièrs, cadavres mutilats de hemnas, panatòris de grana valor (d’un pergam istoric e d’ua machina de tecnologia revolucionària), preséncia de malfrats prèsts tà tot, etc.

Eths politics qu’exigeishen resultats tot viste, ua sola solucion, hèr vier l’equipa deu comissariat centrau de Tarba e eth sué famós comissari Enric Magret entà restaurar l’òrde e la tranquillitat.

La seguida qu’ei laguens deu libe. Eth riquèr de la lenga, la vivacitat deus escambis, l’emplec saborós de diferents nivèus de lenga e de mes d’un parlar. Tanben, mes enlà que la lenga, eth libe que’ns pòrta un escantilh de cultura locau. Tà anar mes luenh eth diccionari de Simin Palay que pòt estar utile que sia tà compréner melhor lo lexic e las practicas etno-gastronomicas (La cuisine de pays deu madeish autor que’vs pòt perméter de ne pas passar hame, o de passar de la hame a la practica).

Enfin e lhèu çò mes preciós, Joan Loís Lavit que’vs herà arríger. Que s’i sap hèr tà distillar eth sué umor dab arsec tot au long deu libe. Que s’i escai mes que tot tà crear situacions, tà manejar hèits imaginaris de qui podem hèr pensar a la realitat, dar clinhets e hèr jòcs de mots (deus bons).

Brac, dab aqueth polar, profitatz d’un bon moment de divertiment, que se’n vau definitivament eth còp.

En tot esperar la mission de qui vié !

O volètz legir un extrèit ?

Descargar un extrèit

A prepaus de l'autor

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Lo CalenDiari

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !