Astaffort Mods, l’anti-Cabrel per excelléncia
Que m’èi a con.hessar. Qu’at sèi, qu’ei mau mes la vertat qu’ei aquiu : qu’escoti mes que musica d’expression occitana. La trasida qu’ei totau, la des·hèita assumida e la mauescaduda completa.
Non serèi pas jamei lo bon sordat entà sauvar la patria tant aimada : que m’arriba d’escotar musicians d’expression francofòna.
Nosta Dauna de Malcosinat, pregatz per jo, praube pecador.
Qu’èi avut la suspresa de càger sus Astaffort Mods en tot passejar-me sus la taralaca, e mes precisament suu labèl paulin à tant rêver du roi.
Dab tèxtes deus gualhards enviats a tot pip-pap dab un accent a depilar tots los cornards e dab ritmicas basicas inspiradas deu grop anglés Sleaford Mods, Astaffort Mods qu’envia la saussa sense retenguda mes dab ua quista assumida : lo minimalisme.
Fotografias realistas de la vita vitanta que son presas : lo mau-víver de la joenessa dab la canta Le Shift, on lo desèrt economic ei totau e on lo solet espèr e seré de cuélher tomatas a Marmanda.
Las figuras locaus qu’i son evocadas dab los famós tèxtes a l’entorn d’aquestes putanèrs de « Piqueboufigue » e de « Denís », especialistas deu conta-ròtle tecnic. Lo tot au bèth miei d’un paisatge meravilhós on podem véger au luenh… l’usina de Golfeish.
L’umor qu’ei hèra plan present laguens los tèxtes e au delà de la lenga emplegada, Astaffort Mods que va a la sorga d’un lengatge franccitan de qui poderem enténer au cahè deu comèrci.
Lavetz, non harà pas plaser aus puristas mes segond jo, Astaffort Mods qu’ei la revelacion musicau occitana d’aqueste abòr.
Pas la mendra videò deu grop sus internet : deu còp que soi hèra curiós d’anar véger aquestes ausèths en concèrt. Que caj de plan, tot un hèish de concèrts que son prevists dinc a Nadau entà hestejar la sortida deu loé prumèr disc aperat AK47, en referéncia au departament d’Òlt e Garona.
La suspresa que serà dongas totau, com lo prumèr còp on ei entenut la canta Le shift.
A defaut d’estar modèèèèèrne com at dísen, Astaffort Mods qu’ei un grop de la soa epòca, plapat d’umor negre e de luciditat.
