Poce !
La jornada èra mal endralhada. La setmana, ja, èra de marrida farina. Marcamal se passejava, e aviá pas daissat lo terren. De tota la setmana, pas mejan de prene un pauc d’avança e d’aprestar la sesilha « fraccions decimalas » que Dòna Laregenta aviá programada pel divendres. Un còp de mai, aviá dubèrt son Manual Grand de Pedagogia Pedagogica e decidit de seguir conselhs e preconizacions : far manipular los dròlles ! Après soscadissas e pensaments, aviá trapat lo biais de far manipular : preparar de bendas de papièr, que serián copadas en 10, puèi cada part tornamai en 10 (lo lector o la lectritz perdut·da aquí pòt utilament anar quèrre son manual de preparacion al certificat d’estudis…)
Aqueste divendres d’aquí, a pro pena arribada a l’escòla, Dòna Laregenta se deguèt mainar del caufatge qu’aviá petat dins la nuèit, de l’Internet que s’èra fach la mala, de la collegueta qu’aviá un papièr de signar per la velha, d’un parent malcontent que la pichòta aviá perduda una carta Panini… Enfin dins sa classa, li demorava pas gaire temps per son descopatge. Te prenguèt los fuèlhs grandarasses, la règla e lo cutter… e zo ! una benda ! E zo, una autra ! E zo… lo poce ! Ai ! (NDA : ai pas l’autorizacion d’escriure los mots vertadièrs)
La classa començada, Poma manquèt pas de remarcar lo sarrapoce que la regenta teniá e de li demandar lo perqué e lo cossí… Dòna Laregenta expliquèt que s’èra copat lo poce en preparant la sesilha sus las fraccions.
« – A ! Me semblava que las fraccions èran coma de divisions, fin finala son puslèu de sostraccions, alara ! »
Es per aquò que lo fau pas qu’amb de pizzas 😀