Seleccionar una pagina

Alandada

0 |

Las APPN, espiar politic suus territòris

Las activitats fisicas de plea natura (activités physiques de pleine nature, APPN) definidas atau preu govern francés taus programas de l’educacion nacionau, qu’arregropan las activitats esportivas practicadas preu dahòra. Gave, mar, montanha… Lo contèxte environamentau que’n supòrta los amainatjaments, e auhereish un contèxte a còps ostile, a còps aidant, tà las practicas aquestas. De qué ganhar en umilitat, vàder un·a observator·a privilegiat·da·s deus ecosistèmas. Pregària de deishar l’endret com ac voletz arretrobar.

Las APPN que son activitats d’equipa, o solitàrias, on los elements naturaus e son partenaris de jòc e d’emocions. Abans de botar la tilhòla a l’aiga, de getà’s dab ua plancha per las andadas, que cau observar, préner cas deu paisatge, de las mareas, de la corsa de la lua, adobà’s dab los vents tà har en·hlar la vela. Causir la paret a garrapitar, on lo só truca e lo vent chaca, pojar shens cès los sendèrs tortuós tà’s ganhar la vista mei esmiraglanta sus espatlas de gigants de pèira… Practicar lésers esportius preu dahòra que’ns religa a l’environament, a çò de viu. L’espiar que s’i ei pausat, la paraula que l’a nomat, e la man que l’a faiçonat. Urbir ua mapa, e’n léger la lenga de las hemblas e deus òmis qui n’an nomat los relèus, las plantas, los ausèths, que mia de cap a ua presa de consciéncia qui religa territòri, lenco e cultura, on e’s bastishen comunautats conscientas. S’i prenem plaser, que vad l’enveja de güeitar aqueths mitans naturaus, tà’n poder grasir enqüèra e enqüèra, e transméter lo gost de la confrontacion aus elements.

Lhevat que, aquestas practicas que son portadas tanben per l’industria deu léser. De las estacions d’esquí a las ciutats balneàrias en passant preus Center Parcs, qu’embarran los contèxtes de practicas, mestrejan lo mei possible lo sauvatgèr environementau, e sustot que descalan e contraròtlan l’espiar. Acerà, n’i vedem pas los bòscs rasats e los ecosistèmas destrusits. N’i vedem pas tanpauc lo lhèit deus gaves traucats, pilhats, preus negociants de calhaus. N’i vedem pas lo passatge a contunh deus camions, qui hè la vita impossibla. N’i vedem pas los vilatges vueitats de tota atractivitat. Etc.

Quina legitimitat e quin pes podem aver, esportius deu dimenge o professionaus deu « léser », simple·a·s ciutadan·a·s observator·a·s deu parçan ? Quin podem har còrda dab lo·a·s qui tribalhan e cultivan la tèrra, tota l’annada, a escala umana e respectuosa de çò de viu ? Quin revendicar drets fondamentaus com víver e grasir d’un environament san ? Los e las qui’n hèn profit que s’apoderan lo dret de’u guastar. La plea natura que’s moneda. L’impaciéncia capitalista que la destrusish. Pr’amor deu progrès. Lo famós progrès. La responsa arronçada a tot hòrt… Quin gausan enqüèra justificar atau lo pilhatge ?

Ne s’ageish pas de sanctuarizar la natura. Mes de se’n har un partenari de vita. S’inscríver dens un ecosistèma, umans comprés, e botà’s au medish nivèu com los autes elements qui ac compausan.

Caminaire·a·s, navigator·a·s, garrapitaire·a·s, esquiaire·a·s, surfaire·a·s, pescaire·a·s, e aute·a·s : contunham de percórrer los territòris, e partatjar lo gost d’estar per dahòra.

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Caroline Dufau

Bearnesa expatriada a Tolosa, Carolina Dufau, dicha Carò, es una artista de terren, mai tots-terrens, de la cantèra, art que mestrèja "de com cau", fins a la vidèo al dintre del Collectiu Dètz. Carò canta dins lo grop 100% femenin Cocanha e dins d'autras formacions, e es tanben redactritz al Diari.

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Los pòdcasts

Los darrièrs clips

Cargament...

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.