Seleccionar una pagina

3QA

0 |

3 Questions A … Moussu T

Moussu T

François Ridel, alias Moussu T, alias Tatou, membre fondator de Massilia Sound System e cantaire de Moussu T e lei Jovents, es nòstre convidat especiau per festejar lei 10 ans dau Diari.

– 1 –

Adieu Moussu T, ven d’espelir un album novèu : Opérette volume 2, podètz nos parlar d’aqueste projècte ?

Es la seguida de nòstre trabalh sus lo repertòri deis operetas marselhesas, portat per lo grope Moussu T e lei Jovents. Contunham de nos interessar ais influéncias de la musica negra sus la musica marselhesa deis annadas 30. Es un repertòri large e ric, dins lo primier volume avèm registrat lei cançons lei mai conegudas, lei « tubes » de la còla Scotto, Sarvil, Alibert : la division 1 dins aquèu domèni. Ambé lo volume 2, siam dins una recèrca mai prigonda. Avèm cercat quauquei perlas escondudas coma de cançons bilinguas onte lo provençau tèn una plaça naturala. Pensi, per exemple, a Andrée Turcy, la nòstra Frehel dau Pòrt Vièlh, una votz femenina mauconeguda. Es çò que nos butèt, tanben, a convidar Rosemary Stanley de Moriarty sus un títol en duò : J’ai rêvé d’une fleur.

– 2 –

Moussu T e lei Jovents, leis operetas, es de musica mai es tanben tot un univers, tota una mitologia non ?

Aquò vèn de l’escòla Massilia, segur. Es mai que de musica, es una vertadièra cosmogonia. I a lo biais de viure, la carrièra, la vida vidanta, lo moment istoric… brèu, tot çò que te carga la musica, non ? Lo trabalh dau musicaire se mescla au monde reau, mai la realitat es cambiada e pantalhada d’un autre costat… Marcha dins lei dos sens. Nautrei, dins Moussu T e lei Jovents avèm un costat visuau tanben qu’es ligat au trabalh de Blu. Sei pinturas dison tot aquò. Puèi trabalham sus la video, lo decòr sus scèna, la comunicacion… per prendre un imatge militant, atacam sus de fronts diferents, en meme temps. Es una globalitat.

– 3 –

Lo Diari festeja sei 10 ans, en parlant de cosmogonia e d’imaginari, justament, coma vesètz e coma pantalhatz la cultura e la lenga d’òc per lei 10 ans de venir ?

I a d’un costat lo nòstre biais, la nòstra pensada, lo camin quotidian, l’accion, regulara, per la creacion e la vida occitana. D’un autre latz, malurosament, i a de causas que nos engarçan, coma lo nom de la Region Occitània qu’avèm mau viscut aquí, o lo retorn dei marrideis ideas maurassianas, lo Collectiu etc… Mai avèm de recuol e fin finala, tot aquò a ges d’importància. Lo metèm de caire, e avançam. Ai pas de vesion exteriora, pensi pas a un eventuau « endeman ». L’occitan es dins la nòstra realitat, au present, coma una respiracion : es lo debanar, l’accion, es lo ritme que nos pòrta. Es coma lo nòstre trabalh musicau, siam de lònga a l’òbra, leis ideas mancan pas perqué siam dins la vida, au còr de la mesclanha !

A prepaus de l'autor

M’aboni !

Anóncia

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !