Ua 42ena edicion per la hèira agricòla de Samatan
Samatan, pichon vilatge de Gers, entre Aush e Tolosa, a arcuelhut coma cada an la hèira agricòla, que s’organiza la tresena dimenjada de març. Aquesta annada que’s passè deu divendres 16 de març e que s’acabè lo diluns 18 a 13 òras per deishar la plaça au mercat de plen vent.
Totjorn d’innovacions per aquesta hèira agricòla au còr deu terraire coma lo ditz lo president de Samatan agri-expo, Alexandre Duval, « Òm poirà mólher las crabas, aprestar e còser de pan biologic amb los Companhons, e los petitons poiràn hér de corrudas de tractors a pedala,shens comptar los guits roge e blanc a las colors de la vila. »
Au programa, d’activitats per tots los gosts : dins la hala a la poralha que i avèva ua expausicion e ua venta de las mes polidas raças bovinas e ovinas, shens desbrembar las raças avicòlas, que i avèva tanben ua pichoneta bòria pedagogica « Los ases de Plagnole » amb d’activitat peus mainatges e tanben ua visita èra organizada peus escolans. Dins lo cadre d’aquesta bòria pedagogica los mainatges podèvan aprénguer a tirar lo lèit de las crabas, mes enqüera prepausavan un talhèr per aprénguer a trescar còrdas e fabricar de burre.
Dins l’expausicion d’animaus trobàvatz d’animaus de la bòria mes tanben d’animaus pauc comuns coma de lamas, un iac, e au miei d’aquò que i avèva ua activitat peus pescaires amb un bacin de pesca a la trueita.
Impossible de mancar davant aquesta hala, l’expausicion agricòla que rassemblava de tractors, de materiau agricòl, per cada cultura, nau e d’ocasion, per contunhar dins los engenhs, davant la mediatèca qu’èran regropats los concessionaris automobilas. E per coronar lo tot i avèva ua multitud de talhèrs que prepausavan de produches regionaus pertot dins lo vilatge.
Totas aqueras activitats se debanavan suus tres jorns, mes las activitats podèvan cambiar en foncion de la meteo. Urosament, lo dissabte qui èra la jornada la mes esperada peus visitors, se passè devath un sorelh printanèr.
Lo dissabte justament que i avèva un vueita-granhèr que se debanava dins la vila hauta, pròche de la glèisa, e per minjar lo miègjorn o la serada podèvatz comptar sus l’associacion deus joens agricultors deu Savès per vos guarantir un plan bon repaish, amb la sua serada tapas tradicionau.
Per acabar lo dimenge la jornada èra dedicada a l’artesanat pr’amor que de panissèrs Companhons fabriquèn de pan devath vòstes uelhs dins lo quadre de l’operacion « de pan de gran »,e aquesta annada la prefècta de Gers, Catherine Seguin, a visitada la hèira agricòla pendent duas òras ont a podut descobrir la convivialitat d’aquesta hèira e tanben montar sus un tractor o enqüera tastar de magret.
Peu president de la hèira qu’aquesta annada èra ua escaduda subretot mercés a l’ostal de la comuna de Samatan qu’a administrat lo blocatge de daubunas carrèras per perméter ua melhora circulacion deus visitors. La hèira qu’estó donc ua escaduda qui a permetut un escambi au centre de nòste terraire gascon.
