Tè Vé Òc – Estiu e dintrada
Programa
L’estiu de Tè Vé Òc 2018 es comol d’accions divèrsas : Nòstrei cadraires filman mantuns eveniments e n’auretz la suspresa tre setembre : leis adobaires de cagaraulas, de vinhas ben particularas e l’associacion Siloé que mena d’accions d’integracion per lo biais de la vela.
La Bovina es presenta au Musèu Auguste Jacquet de Bèucaire (30) : una visita, un artista, amb de documents preciós d’archius e de pinturas de Frederic Monnet, lo tot presentat per un òme de Bovina, Joan Pèire Ode e lo pintre.
Lo collectatge a tanben una plaça de tria, en cò deis ancians qu’an de tresaurs de testimoniatges de nos liurar.
Resson sus la recèrca e la reflexion
Podretz trobar lei captacions fachas a Tolosa per Amada a l’escasença del seminari de l’IEO « Vie et survie des langues minoritaires. Le cas occitan ».
Lei projèctes pedagogics 2018/2019
En setembre leis ensenhaires tròban sus nòstre site d’entresenhas sus lei projèctes pedagogics audiovisuaus en collègi en relacion amb lo projècte academic, ajudat per l’Associacion Zo Petaçon. Nos podràn contactar per preveire d’intervencions amb lo projècte 18/19 : Paisatges www.teveoc.com/pages/produccions/page-1.html
I veiràn tanben lei tres filmòts originaus realizats en 2018 : Imaginatz un chivau, Collègi Brignon 30, La Masca, Collègi de Sant Geniès de Malgoirès 30, Los amics de la Baragònha, Collègi d’Ambrussum (Lunèu, 34)
Realizacion d’un documentari de 26 mn en partenariat amb lo CIRDOC : « Nimes, a travèrs seis autors occitans » que serà presentat sus Occitanica e nòstre site tre la dintrada.
Vesètz que, s’avèm pas lei mejans financièrs dei cadenas grandas, avèm lo socit de realizar d’emissions de qualitat que pegan a l’actualitat occitana, tant rica e variada.
