En Menerbés, per las vinhas, los cabanòts servissián per recaptar los espleches, abrigar de l’auratge vendemiaires e vendemiairas, aculhir las amors bartassièras qu’i venián nisar d’amagat. La particularitat d’aquestes granjòts e masets es que pòrtan de pichons noms femenins : Carmen, Liseta, Annà… Entau s’aparentan a de villàs batejadas dau mème biais. Miquèl Decòr a causit d’evocar lo destin tragic o malaürós d’unas femnas e filhas presas dins la chavana de la guèrra, victimas de degalhs collateraus. Aquestes tèxtes fan resson a Agost de guèrra publicat en 2007 dins la colleccion A Tots de l’IEO. I trobam la mèma ambicion de l’autor de rendre justícia a d’èssers simples sovent moguts per l’amor. Aquesta publicacion, fisada per Miquèl Decòr a l’IEO-Erau, l’autor l’aurà pas vista espelir, que se n’anèt dins l’annada 2021. Grand gaug que n’auriá agut…