L’òbra de Robèrt Lafont es immensa, e çò que caracteriza aquela figura occitana de primièr plan es la vastitud dels camps investits : poesia, teatre, roman, ensag, estudi… Aital, per sasir lo personatge dins totes sos aspèctes, e especialament los que se coneisson mens, un triò d’universitaris de tria causiguèron una seleccion d’articles, d’eles mas pas sonque, publicats entre 1990 e uèi. E la causida es biaissuda : en multiplicant los apròchis, los punts de vista e los camins sensibles, se sarran del gost del mèstre per la poligrafia, per una literatura de la vida, de la pensada e de qualques batèstas. Sens se cargar de la pretension d’èsser l’obratge definitiu sus una tala figura, e sens se voler adreiçar als sols universitaris, Dire l’homme le siècle prepausa puslèu un barrutlatge saborós al país d’una literatura inagotabla.