À la Quinte, quò es cinc votz, quelas de las sòrs Auzeméry, que s’acòrdan per chantar en occitan dau Lemosin, aquí emb las percussions de Cécile Haudiquet. Queu prumier disc siguet enregistrat dins la nau de la gleisa d’Engoissa en Dordonha e perpausa una lonja balada de 16 títols que trauchan los luòcs, las sasons e las scenas de la vita paisana (e tanben doas chançons de Melhau tornadas interpretar). Una òbra de las armonias finas e de las evocacions sovent quasi mitologicas. En amont eran los collectaires, los davanciers. En avau chanta À la Quinte.