Prèmi de la cançon occitana Joan-Pau Verdièr 2020
Prèmi de la cançon occitana Joan-Pau Verdièr 2020
Se los Occitans sabon compausar, tutar musica e cantar, les cau ajudar en “hèr de brut” a l’entorn de lors creacions. Es ad aquesta tasca que s’es estacada l’agéncia tolosana Virasolelh, nascuda au bèth miei deu confinhament de 2020. Es pas una agéncia de promocion d’artistas, mes de la lenga occitana capvath las arts.
E per balhar resson a una disciplina, degun a pas trobat milhor que d’organizar un prèmi annau. Sufís pas que de véser la repercusion mediatica deus Oscars, deu prèmi Goncourt, de la Palma d’Aur e de totas las manifestacions qu’an seguit (Molières peu teatre, Victoires de la Musique, Grand Prèmi de la BD d’Engoleime, sense se desbrembar deus Jòcs Floraus, etc …)
Es per aquò qu’estoc creat aquera annada 2020 lo purmèr Prèmi de la Cançon Occitana deu nom de Joan-Pau Verdièr, cantaire important qu’acabava de’ns deishar e a qui calèva hèr aunor.
Lo siti www.virasolelh.org èra ligat a una pagina SoundCloud on lo monde podèva votar per las cançons que l’agradava entre las nautats de l’annada deus artistas seguents : Thierry Salles, COT, Cortesia, De la Crau, Séverine Bonnin, Sam Karpienia, Alidé Sans, Duo Verger Cavalié, Christian Almerge, Djé Balèti, Eydolon, Muriel Batbie Castell, Gojats of Hedas, Goulamas’k, Sarralhèr, Eric Fraj, Boisson Divine. Es totjorn en linha, i a de qué hèr beròias descobèrtas.
Estoc pas una suspresa se lo cantaire Christian Almerge ganhèc las favors deu public dambe sa cançon “Ma Tèrra occitana”.
Conegut dempuèi longtemps dambe lo grop TEST per sas adaptacions d’esperit risolièr en occitan (“Lo Mildió” per “Only you“, “I love cagaròls” per “I love rock’n’roll” mes sustot l’irresistible “Massey Ferguson“, parodia deu gainsboresc “Harley Davidson“), Christian Almerge signa aquí una polida ballada fòlk pingorlada d’una punta de sonoritat medievala (omenatge aus Trobadors) mesclada au son d’una guitarra “metau” e acompanhada d’un polit tèxte generós e poetic, declaracion d’amor au país.
S’aqueste palmarés consacra purmèr quauqu’un de confirmat, la dusau plaça, per contra, es devoluda a una cantaira de descobrir peu public occitan, Séverine Bonnin dambe “Catarsis” de l’autor Paul Turchi-Duriani, adaptada en occitan per Franc Bardòu damb la musica d’Yves Ousset.
Lo prèmi deu milhor filmòt vidèo de l’annada, eth, elegit per un grop de professionaus de la vidèo, es decernit au clip “COTELON” deu grop COCANHA.
L’agéncia Virasolelh, organizatritz de l’eveniment, se regaudís de las 1264 votacions, çò que, per un concors tot navèth, es una escaduda de las beròias. Tre que serà possible, una serada serà organizada a Tolosa per la remesa deus prèmis, un omenatge a Joan-Pau Verdièr, la presentacion deus filmòts nomejats e lo concèrt deus laureats.
