Un projècte de collectatge de microtoponimia

Sabèm totis cossí los campèstres miègjornals, coma los autres, an cambiat desempuèi qualques desenats d’annadas. Las evolucions de la societat tota fan que los espacis son pas pus utilizats coma o èran pel passat. Un fum de prats e de camps venon de bòsques, adoncas son pas pus pasturats o laurats, e adoncas son pas pus nomenats. D’autra part, la populacion mestreja de mens en mens l’occitan, lenga de la nominacion de la màger part d’aquesta mena de luòcs. De segur, documents escrits existisson que pòdon èsser legits al archius de cada departament : cadastres, actes de notaris, etc. S’i trapan de nom de luòcs e aquestes documents son servats, avèm léser de los estudiar, qu’i seràn encara dins qualques annadas. Mas los qu’i seràn pas pus, son los vièlhs, los qu’an laurat la tèrra e qu’an apasturat las bèstias pels campèstres, los qu’an utilizat l’espaci, e adoncas que l’an nomenat. D’efièit, amb cada vièlh e vièlha que se morís, son de noms de luòcs que s’avalisson.

Per aquestas rasons, l’IEO d’Arièja, dins son conselh d’administracion del 9 de febrièr de 2019, a decidit de començar un trabalh de collectatge de microtoponimia dins Arièja tota, trabalh que de segur caldriá espandir a totis los païses occitanofòns, qu’aquestes noms de luòcs per la màger part son occitans.

Aqueste collectatge se fa amb païsans, caçaires, cercaires de camparòls, etc. per un grop d’amators qu’i vòl participar. Çò primièr, cal constituir aqueste grop, puèi far la tièra de las personas a interrogar amb d’extractes del cadastre dels luòcs, per i botar dessús los noms de las pèças de tèrra. Puèi, las informacions seràn centralizadas per èsser dintradas dins un SIG (Sistèma d’Informacion Geografica) e analisadas.

Aqueste projècte es complementari del trabalh que se fa a la Comission Toponimica Occitana de l’IEO (http://bdtopoc.org/). Caldriá que macrotoponimia e microtoponimia se juntèsson dins un projècte comun e partejat per totis los sòcis de l’IEO.