Seleccionar una pagina

Luènh de l'uèlh

0 |

Lo jòc de l’imatge e de l’azard

Lo teatre es lo luòc de la mesa en scèna dins un quadre que delimita fisicament una accion. La sala e son public, la colissa e mai lo tèxte constituisson un fòracamp, la sosjacenta de çò que, a priòri plan ordenat e tot previst, va se passar sus la scèna. Puèi, mentre que mestrejat amb precision, grand es l’espaci dins l’escambi entre lo tèxte brut, los artistas e lo luòc, lo moment, las gents que l’aculhisson. Aqueste abotiment a de veire amb la construccion d’una fòto.

Usurpacion de l’azard, recèrca delicata d’un equilibri. Es d’autan mai verai se lo cal trobar sul fial d’una fraccion de segonda. Malgrat la pus estricta mesa en scèna d’un imatge, la fòto demòra lo produch de la volontat conscienta o non, tant digam de la memòria, del fotograf, d’un modèl e de tan d’autras causas. Puèi l’azard se maina de fotografia : azard tecnic amb un aparelh mal reglat o que disfonciona, azard d’un eveniment non previst o just impulsat que travèrsa lo camp per que la balança se faga « naturalament ». L’idèa de daissar sa part al sòrt acaba de seguir e de seduire lo fotograf.

De mai, la produccion d’imatges de totas menas visquèt totjorn una confrontacion entre çò que vòl exprimir l’artista e çò que lo modèl vòl plan mostrar o escondre. Coneissèm totes los retraches teatrals de fa bèl temps. A l’epòca de la lentor de la fotografia e del sovenir de la pintura, la mesa en scèna èra indefugibla. Alavetz l’efèit teatral, al marrit e de còps comic sens del tèrme, pren lo dessús. Gaitatz aquelas fòtos oficialas dels presidents de la Republica : d’actors amators ne fan un pauc tròp dins un excès de mesa en scèna.

Cobèrta Lo Diari 62

 De çò que nos es familièr – de personatges se parlan e agisson davant nosautres – lo teatre ne fa quicòm d’estranh o d’extraordinari. Nos fa veire e comprene los ressòrts d’una realitat e la mecanica que la fa existir. L’installacion d’una situacion reala dins una constrencha de temps e d’espaci nos fa veire los engranatges d’una boita negra ficcionala. Vesèm l’efèit se far. A mesura que la pèça avança, percepcions, prigondors, mesas al punt s’ajustan per conclure sus un portfòlio de la situacion representada. Es a dire que lo jòc combinat a l’azard del moment fan montar doçament un flòc de tablèus o d’imatges ; coma un fotograf qu’es a prene mantunas fòtos fins a trobar la bona sintèsi, la que « marcha » !

Es una question de contorn del temps e de l’espaci. Far una fòto de carrièra per exemple es trobar un quadre, traçar una scèna e esperar aquela segonda ont se diriá qu’una istòria se farà jorn. Arrancar una part de teatre e de jòc a una situacion d’azard. Metre en scèna.

Cobèrta Lo Diari 62

The Idle Inn, 1930 – Library of Congress

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Sylvain Béragnes

Nasquèri a Vilanòva d’Òlt e passèri mon enfança dins un vilatjòt a la punta del Tarn e Garona entre Carcin e val d’Òlt abans d'anar viure a Tolosa. Aprèp aver comprés, tard, l’importància de la lenga qu’ausissiái dròlle, decidiguèri de l’aprene per de bon. Soi un afogat de fotografia : practiqui de contunha, expausi de còps. S'endeven que los projèctes fotografics e l’occitan se rejonhon.

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Los pòdcasts

Los darrièrs clips

Cargament...

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.