L’IEO del Vilafrancat
L’IEO del Vilafrancat nasquèt en Roergue mai de 40 ans fa, en 1975. L’associacion, que recampa ara a l’entorn de quaranta sòcis, tanplan d’estudiants coma de retirats, a per tòca de difusar la lenga dins La Vila e sos entorns, a travèrs d’animacions e d’eveniments divèrses tot lo long de l’annada. President pendent un vintenat d’ans, lo Jaconet, Jaqui Ten, daissèt sa plaça fa qualques temps a Francis Alet. Amb una còla de benevòls motivats e fòrça implicats dins la vida de lor vila, coma lo quite creator del cercle, l’escrivan occitan plan conegut Sèrgi Carles, aquesta seccion locala se bolega per far viure la lenga e organizar tant coma pòdon d’activitats culturalas.
E son ricas e divèrsas, las activitats ! De corses de lenga a La Vila e a Morlhon cada setmana, pels debutants tanplan coma pels confirmats ; de conferéncias, de contes e de mòstras en partenariat amb la bibliotèca e la mediatèca vilafranquianas ; d’espectacles, de balètis e de concèrts ; de teatre e de projeccions de filmes ; dos talhièrs de cant amb Renat Jurié ; sens oblidar la Dictada e las Setmanas Occitanas que tornan cada annada ! Aital, a La Vila, lo mes de febrièr tot entièr es dedicat a l’occitan. Las associacions e las institucions de La Vila se jonhon a l’IEO per l’organizacion dels eveniments, e lo mes s’acaba en musica e danças amb lo festenal de musicas tradicionalas FestiBal a La Bastida de l’Avesque.
L’IEO de Vilafrancat s’implica tanben dins las escòlas. Lo 29 de mars de 2019, mai de 200 escolans roergats s’amassèron a La Roqueta per l’espectacle « Lo Sòmi de Coquinon » jogat per La Talvera. Lo grop contunhèt alara la serada amb una iniciacion a las danças e un bal grand, organizat amb l’ajuda del talhièr de danças tradicionalas del vilatge, e la comuna. Las comunas, elas, son en demanda d’activitats amb lo cercle occitan roergat, e lo public es plan present.
Dempuèi qualques temps, l’associacion es en cèrca d’un local dins la vila per se poder desvolopar, ela e d’autras associacions occitanas del Vilafrancat, talas coma l’IOA, l’Adoc e l’escòla bilingüa del Tricòt. Aqueste projècte d’Ostal Occitan se poiriá realizar dins los meses que venon, amb l’ajuda de la comuna. Ara, l’IEO trabalha ja a la programacion de l’annada 2020 (que serà lo 100en anniversari de la naissença de Joan Bodon), amb las Setmanas Occitanas plan segur, e tanben lo retorn mai que probable del festenal Para la man de Morlhon. Portat per l’IEO e per La Tambouille, una còla de joves de Morlhon mai que motivats, aquel festenal mescla l’occitan amb d’autras culturas (berbèra, tsigana, bretona), e las edicions passadas foguèron una capitada !
Enfin, totas las nòvas de l’IEO del Vilafrancat e las activitats en ligam amb l’occitan a l’entorn de La Vila se pòdon trapar cada setmana dins lo jornal local Lo Vilafrancat, amb un article grand cada doas setmanas, e puèi cada dimècres dins l’emission Passejadas occitanas animada per Jaqui Ten sus CFM Ràdio.
