Per çò qu’ei de l’audiovisuau, las costumas de consomacion qu’an cambiat au briu deus ans : qu’èm au còr de mudaments pregonds. La supremacia de la television qu’ei miaçada per l’internet. En efèit, 2019 qu’ei coneguda coma l’annada on internet a despassat la television en tèrmis d’òras de visionatge : 170 minutas per dia entà internet (telefòne + ordenador) contra 167 minutas tà la television. Plan segur, las chifras que cambian segon la classa d’atge presa en compte : los 15-24 ans que son los de qui’s viran lo mei de cap a l’internet.

Las mesuras d’embarrament qu’an tornat bàter las cartas e los francés que’s son virats de manèra creishenta de cap aus medias (television, ràdio, premsa, hialats sociaus, servicis de VOD…), entà respóner a l’encòp a un besonh d’informacion constant com a un besonh de divertiment.

Dens aqueth contèxte nosautes, actors de l’audiovisau, nos sèm retrobats cap a un paradòxe dab nivèus d’audiéncia inedits mes ua difficultat a podér produsir en pr’amor de las restriccions en aplicacion.

ÒCtele qu’ensagè de resòlver l’equacion informacion + divertiment tau sué public. Tau divertiment, qu’avem prepausat pendent l’embarrament las nostas emissions costumèras dab ua auhèrta mei importanta deu costat deus filmes e documentaris. Entà tractar l’actualitat, qu’avem creat un navèth programa : ÒCMobilizacion. 11 episòdis dab testimònis d’embarrament : professor, medecin, estudiant, musicaire, cap d’enterpresa … tots qu’an jogat lo jòc de’s filmar a casa entà auherir lo lor espiar sus aquesta temporada. Mercés a eths, qu’avem podut hèr rimar embarrament dab solidaritat !

 Que podetz retrobar tots los episòdis suu site d’ÒCtele rubrica ÒCMobilizacion.