Jovença e Ratapenada
Zo ! Ziu ! Pataflòu ! Dempuei que Burton e Nolan s’i acarèron, lo personatge de Batman au cinèma ajuda lei joinei cinefils a intrar dins lo banh dau seten art. Alora, aquela Ratapenada, perqué te pivela ? Ai rescontrat un estudiant que nos vai explicar coma lo personatge de Bob Kane ven lo Mèstre assumit dei cineastas de deman dins una Gotham de mai en mai decomplexada.
Bat-sinhau sus Arsène Kuentz, 16 ans. Fa fòrça musica rock/metal ambe son grop e fa tanben lo compositor. Estúdia lo cinèma e l’occitan au licèu d’Aurenja. Realiza clips e filmonets.
Sei promiers ensags artistics fuguèron a l’entorn dau chivalier negre.
Pòs me dire perqué Batman es un motor dins la tieuna jove vida artistica ?
Batman es, segon ieu, un personatge qu’a marcat fòrça jovents mercés a sa personalitat freja, misteriosa e escura mai tanben son costat uman. Coma a pas cap de supers poders, es expausat a totei lei dangiers. Coma a d’originas desparièras, lo podèm tornar inventar coma volèm, sensa fin. E puei, es un eròi que manca pas d’antagonistas marcants : lo Penguin, Mister Freeze, Poison Ivy e evidentament lo Joker que pivela tant coma la ratapenada de Gotham City.
Qu’es l’univers e l’estetica que devèm mestrejar per una òbra coma aquò ?
Devèm d’en promier comprendre la psicologia dei personatges, son univers ! Ma fista, fau s’inspirar de l’òbra deis autrei. Que siá sus lo biais de bolegar la camèra ò de jogar ambe lo lum. Me siáu fòrça inspirat de l’expressionisme alemand (Nosferatu de Mürnau) per leis ombras e de l’estile de Jean-Pierre Jeunet per lei colors. E, bota, amb aquela mescladissa, me siáu creat una identitat.
Perqué aqueu pivelatge quora començam ?
Es un personatge qu’a bòn biais, es poderós, es ric. Son vestit e sa siloèta inspiran la paur. Es torçut, malancòni, venjaire, es toteis aqueleis elements que lo tòrnan uman. Pense pas que represente la jovença. Pichonet, n’ère ja fadòli. Mai sa psicologia es talament complèxa que se pòu pas dire se fau s’identificar a-n eu ò pas. Es un personatge qu’a perdut de son umanitat, qu’es de còps mostruós, es doncas tanben un pantais. Auriam tendéncia a l’arborar au nivèu d’un personatge mitic ò d’un Dieu, se se pòu dire. Per ieu, çò que m’agrada en cò de Batman es son esperit detectiu, discret, mai que contrasta ambe la violéncia fisica e mentala qu’empega a seis enemics.
Ai vist sus ta cadena Youtube qu’as de projèctes a l’entorn de Batman ?
Ai escrich, realizat e montat dos gròs projèctes sus Batman. Mon promier en 2017, èra una adaptacion dau roman grafic d’Alan Moore The Kiling Joke. Mai lo resultat es pron « narnardesc ». Fin de 2018 cap a junh de 2019, me siáu lançat dins un filmonet mai aqueste còp amb un scenari originau onte racontave leis originas dau chivalier negre. Aqueu d’aquí èra mai convencent, amb de materiau, un scenari, d’actors implicats. Mai tot aquò demòra amator.
Pòs dire, ara, que Batman te permeteguèt de venir cinefil e te dubriguèt l’esperit a d’autrei cinèmas, d’autrei culturas ?
Òc, en m’informant sus leis influéncias dei realizators, sei referéncias, sa filmografia, me dubriguère a de cinèmas que me cresiáu pas de descubrir un jorn. Rescontrère fòrça joineis artistas qu’escrivián de tèsis sus Batman, ensajavan de fargar de vidèos a l’entorn dau personatge, e venián cineastas mercés a-n eu, e mai se s’aluenhavan d’eu mai tard.
L’escritura d’aquel article es un pretèxt per retrobar un estudiant mai, Matieu Rijpstra. M’avise coma dempuei pichon lo personatge de Bob Kane li permet una cinefilia dei bèlas. Uei, acaba sei 18 ans e estúdia lei letras e lo cinèma au CPGE literari de Mistral en Avinhon. Ai trabalhat amb eu per lo prèmi Jean Renoir puei s’es especializat en promièra e terminala per realizar un film de fin d’estudi poetic e ambiciós : Journey.
Alora, Matthieu, la Ratapenada e tu ?
La vertadièra revelacion me ven ambe The Dark Knight : çò que m’agrada mai que mai es l’adaptacion fòrça realista dau personatge de comics. Lo filme penja soventei fes dau caire dau thriller e prepausa de vertadièras causidas cornelianas, un questionament societau sus sei fondamentas (lo Joker mòstra d’interès per lo caòs). Es aicí que comprene qu’en cò de Batman çò que me pertoca es son costat uman : es un òme, es vulnerable, e vai en delai de sei limits.
Qu’es per tu l’adapatacion mai complida dins l’istòria dau cinèma ?
The Dark Knight, segur. Per son costat negre, promier : Gotham apareis coma una vila en crisi d’ideau : totei son susceptibles d’èstre corromputs, pas cap d’eròi per resistir a-n aquela vila. Pasmens, apareis coma una ciutat americana classica (Nòva-Iòrc, Chicago). Per sei personatges : reprocham soventei fes ai personatges de comics de mancar de pregondor. Aicí, an totei una istòria, d’interès dispariers e son confrontats a seis ideaus.
Coma la dises l’estetica de Batman en generau ?
Gotica, de còps que i a. L’estetica de Batman se situa entre realisme e misticisme, entre l’òme lo jorn e la creatura la nuech.
Batman jòga un ròtle important per un cinefil d’uei ?
Segur. Batman es una dubèrtura ja au cinèma de Burton, Nolan e Snyder qu’an cadun apondut son biais personau a l’ensems. S’es una dubèrtura au fantastic en cò de Burton, Reeves, eu, promet un film policier.
Perqué aqueu pivelatge dei jovents per lo personatge ?
Es lo supereròi mai escur, mai matrassat. Aquò agrada sempre a-n aqueu periòd onte la leugieretat Marvel e lo perfiech Superman atrivan pas plus. Cercam de la maduresa, de realisme, au sens qu’es un mortau trevat per sei demònis.
Aquela fe per Batman s’arrèsta quora costejam d’autrei cinèmas ?
Nani. Evoluís la fe. Venèm sensibles a d’aspèctes, a d’autrei non, pas plus. L’espectacle, lo gatget, perdon de son pivelament. Lo combat interior i ganha. Es la passion per lo supereròi que demenís, a flor e a mesura que leis adaptacions cinematograficas perdon de son audàcia, de son originalitat.
Perqué te pivela, Batman ?
Es quauqu’un que s’escond darrier la masca : play-boy miliardari, lo chivalier negre es pas qu’un ensems de dos personatges. Lo problèma es que se deu situar entre lei dos. Sa relacion ambe lo Joker es fòrça interessanta qu’aqueu agís sus eu, li desvela sa part de baujum. Batman es un fadòli va fau dire. E mai passa lo temps, e mai ven violent, aigrit, afeblit. Lo crime es sempre aquí, coma pegat a l’òme.
