Seleccionar una pagina

Critica musicala

0 |

Du Bartàs, fin finala

Aprèp quinze ans de concèrts e 6 albums, Du Bartàs ven de far sa reveréncia a l’escasença d’una serada d’adieus lo 6 de novembre. La còla del Menerbés es estada un temps un pòrtabandièra de la cultura occitana. Daissa una òbra discografica rica e de concèrts a plens remembres.

« Benlèu la primièira beluga, la primièira enveja, èra de far d’acordeon ambe de percussions » se remembra Laurenç Cavalièr, lo musician a l’origina de Du Bartàs. Precisa que son « dos instruments que pòdon préner lor plaça sens concurréncia acostica ». Lo grop se bastiguèt aital ambe los musicians Jocelyn Papon e Pascal Tenza, puei venguèron Clément Chauvet, Abdel Bouzbiba, Titouan Billon, Phillipe Keller, Clément Gleyze.

Du Bartàs, en mai de sas creacions originalas, tornèt visitar un repertòri lengadocian popular, de còps oblidat, e botèt en musica de poètas coma Leon Còrdas. La resulta d’una vertadièra reflexion sus l’identitat e la cultura occitana, un trabalh d’apassionats, que faguèt lo ciment de la còla. Abdel, que juntèt lo grop, rapèla que « quand òm creis en vila aquí, vesèm pas briga la campanha », e que çò de sedusent dins Du Bartàs èra l’estat d’esperit paisan, que venguèt apondre a sa cultura personala « lo terraire, lo blèd de Lengadòc ». Per Jocelyn, l’aventura bartassièra es tanben estada una escòla de l’occitanisme : « me soi encafornat dins de lecturas occitanistas e istoricas d’en cò meu, sul carnaval, sul patrimòni immaterial del canton, ai aprés pauc a pauc la lenga. »

D’un collectiu en emulacion permanenta, totis los membres se recòrdan de conversacions politicas, culturalas, filosoficas dins lo minibus, per las viradas, de moments qu’an fargat l’èime de 6 albums.

E totis parlan d’un grop ont cadun podiá trobar sa plaça ; los adobaments se faguèron amassa, Cavalièr menava « de carbon a la maquina, es a dire de tèxtes, de tròces de melodia… puèi lo son de Du Bartàs èra la resulta d’una creacion collectiva ». Es aquò segurament que ne faguèt un grop original, que viatgèt fòrça e aguèt quitament las onors de mèdias nacionals coma Libération o France Inter. Mas aquò demòra en fait pro anecdotic dins l’istòria del grop, çò mai important pels musicians es l’evolucion collectiva e individuala pel trabalh complit, los rescontres ambe lo public, los musicians, los que los faguèron jogar, qu’aquò siá sus de scènas de prestigi coma Les Vieilles Charrues o dins un pichòt restaurant al pus fons d’Itàlia.

Se Cavalièr concedís que las darrièras annadas foguèron mai pausadas, lo grop se farguèt una reputacion de convivialitat e de partatge, pr’amor que trantalhavan pas jamai de tornar jogar lo repertòri a la beguda, en acostic, un còp lo concèrt acabat… E, o cal dire, lo grop es totjorn estat disponible per ajudar lo monde associatiu occitan, aquò marca.

Du Bartàs se dessepara sens planhs, e plen de sovenirs en pòcha ; ara comença un temps nòu, un temps per far espelir d’autres projèctes. Per Jocelyn e Abdel la seguida s’escriurà amassa ambe Arab’Òc, que far cantar arab e occitan de mainatges de Carcassona, e tanben ambe un espectacle per enfants, Vesins, que « conta la nòstra vida romancejada, lo rescontre entre un filh d’immigrats marocans e un filh d’ immigrats bretons ». Un espectacle entre teatre e musica.

Per Laurenç, arrestar Du Bartàs serà l’escasença « de tornar localizar mon activitat musicala, ensajar de tornar venir lo cantaire del canton. E de valorizar tot lo trabalh de collectatge menat dempuèi 20 ans… ».

E cric e crac Du Bartàs es acabat !

L’album de Du Bartàs mai aimat
per Du Bartàs :

Patwa

Es contra ta pèl

Du Bartàs
Sirventés, 2012
15€

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Guillaume Gratiolet

Nascut en Òlt e Garona, Guillaume Gratiolet viu ara a Tolosa. Òme de mèdias, passèt per mai d'una ràdio, faguèt tanben de television, avant de s'ensajar uèi a la premsa magazine escrita dins las colomnas del Diari. "Selecta" (DJ) e animator, Guillaume es tanben un afogat de musica e de "pop culture", doas passions que parteja amb lo monde e en occitan se vos plai al dintre del projècte "Lo Clam", ont parla tan de serias tele que d'espòrt, de cinèma o de videojòcs, entre dos "esquètchs" risolents e de seleccions de cançons plan mitonadas. Quand foguèt sollicitat per far partida del còr de l'equipa del Diari, respondèt "òc" còpsec. Una evidéncia !

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Los pòdcasts

Los darrièrs clips

Cargament...

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.