Desvelar lo Jòc

La causa qu’auretz segurament compresa se nos legissètz dempuèi qualques tempses es que al Diari ensajam de demorar a la punta de l’innovacion. La còla vos espèra aital dejós la primièra cobèrta jogabla de l’istòria ! Al mens del magazine. Aquò dona un Diari sul jòc… amb de jòcs en soma. Solide, articles, reflexions, cronicas, vos destorbaràn pas, sonque s’acompanharàn aqueste còp de contenguts ludics o “ludificats”, coma se ditz, en referéncia a aquel Homo Ludens que d’unes teorizan per descriure l’importància que ten lo jòc dins nòstras societats… Farem çò que vòstre còr desira al pus prigond : un jòc de decopatge dins un apondon de 4 paginas centralas, amb nòstra mascòta per peteta, si-ben ! Quatre paginas de mai, e aitant de novetats, per tal de vos interessar, far pensar e divertir. La descobèrta escarrabilhada, la curiositat, seràn de bonas companhas per aquesta partida, coma d’acostuma, e encara mai que d’acostuma. Aguèrem aquela idèa bauja : fargar un quasèrn de vacanças : i sèm pas encara complètament mas lo camin (d’estiu) es plan endralhat !

Nòta : se ditz que se del paragrafe çai-sus prenètz lo 1èr mot de la 1èra frasa, lo 2nd mot de la 2nd frasa e aital en seguissent aquò vos formarà una senténcia, un messatge d’importància primièra – e un primièr jòc ! – adreçat a tota nòstra comunautat de legeires e legeiras… Bona lectura… o bon divertiment !