Lo Diari e l’OPLO convencionan sus de revistas pels joves
Lèu un 2nd Diari fòra seria pel jovent ! (e un 3en, un 4en…)
Aprèp lo succès rescontrat per un primièr Diari fòra seria l’an passat, l’Ofici Public de la Lenga Occitana ven de convencionar amb l’equipa del magazine Lo Diari per tal de sortir pas un numèro, mas plan 3, sus 3 ans. Lo primièr n’es previst per l’annada escolara 2022-2023.
Aquel document vendrà completar l’ofèrta – jamai pro importanta – de produits culturals occitans qu’existisson a destinacion dels liceans e liceanas de las 2 regions Novèla Aquitània e Occitània e serà espandit un pauc mai largament a la joventut de biais general.
Per lo magazine Lo Diari la tòca editoriala d’aquel fòra seria es totjorn la meteissa : pas a tota fòrça parlar de cultura occitana, que lo Diari regular sèrva aquesta mission, mas puslèu d’èsser en capacitat de dialogar amb los liceans e liceanas de lor cultura, sonque d’o far pel biais de la lenga occitana.
L’elaboracion d’un segond Diari fòra seria “Especial joves” es aital aviada ! E vos gardam encara qualques suspresas sul contengut, o çò qu’acompanharà aquela parucion. Avèm totjorn un fum d’idèas, aquò segur !
Mas, per contra, ara qu’i pensam…
Volètz participar ?
La còla de redaccion dels Diaris “joves” se vòl alargar e rejovenir per tal de sasir melhor las espèras e las envejas del public que serà tocat. Aital se vos sentissètz, qué que siá vòstre nivèl de lenga (vos acompanharem dins l’escritura se cal), vòstre parlar, Lo Diari vos ofrís la possibilitat de participar a l’aventura. Vòstra contribucion poirà aital préner la forma d’una cronica/entrevista/critica sus de tèmas variats coma : literatura, musicas, BD/Comics, manga, dessenhs animats, jòcs, videojòcs, cinèma, serias, sciéncias, novèlas tecnologias, numeric, ecologia, espòrt, societat, viatge, istòria, e ne passi…
Podètz far un sol article per un sol numèro, o tanben preveire un daquòs a seguir sus 3 numèros, una seria, un fuelheton, o un arc narratiu digne de las melhoras serias del moment…
E senhalam que tota participacion retenguda serà remunerada !
Alavetz, cossí far ?
Emplenatz lo formulari çai-jos en precisant vòstra idèa d’article. A la debuta-mitat de setembre estudiarem las candidaturas e veirem amassa, per cadun·a, çò qu’es possible de far !
EDIT (19/09) : mercés a la mobilizacion de totes e totas, faguèrem lo plen de contributor·a·s per aquel Diari fòra seria “joves” venent. Ara nos va caler causir ! Podètz pasmens contunhar de vos marcar se jamai volètz participar als numèros seguents.
