Biaisses de dire sus Instagram
Se dison Man e Mi e arriban amb una idèa tota simpla, enfin segurament mai simpla a pensar qu’a menar, anatz veire : se servir del mèdia social Instagram per illustrar amb l’occitan de situacions de la vida del cada jorn. O sabèm, Instagram ten aquesta particularitat de valorizar l’imatge, es complètament dedicat a aquò, amb sos famoses filtres que fan ara partida del nòstre paisatge visual. Las grandas marcas s’i enganan pas d’alhors, amb una utilizacion sovent abotida de l’espleit per se far lusir. Alavetz perqué pas i far lusir la lenga ? Es segurament çò que se diguèron nòstras doas amigas, qu’i emplegan, amb d’illustracions « faitas man », çò que la lenga occitana ten de mai visual justament : sas « mila milanta » expressions imatjadas. Lo principi es simple, benlèu, mas demanda çaquelà un pauc de trabalh : de plancardas amb de frasas calligrafiadas, en negre sus fons blanc, apareisson sul compte, amb de formulas de la mena « Ne dites pas… mais plutôt… », convidant a l’emplec d’un biais de dire plan occitan dins l’encastre trivial d’un quotidian que lo francés i senhoreja. Puèi un dessenh ven completar de biais umoristic aqueste torn de lenga, s’agirà sovent d’una mesa en situacion, de còps bravament absurda, dels dobles de papièr de Man e Mi. La mesa en valor d’un patrimòni lexical occitan (un quite occitanofòne de sempre i aprendrà son quicomet) fonciona plan, servida per una tecnica que, emai foguèsse artesanala, capita de nos tirar lo risolet. Las aisinas numericas bèlas de socializacion servirián tanben a far conéisser la lenga ? En tot cas amb Las aventuras de Man e Mi poiriam començar d’i creire !
